Орсон гарсан бүхэнд бэлэг өгдөггүй ба наймаас доош насны балчир хүүхдэд хэрэгтэй гэсэн зүйлийг нь өгдөг, арван гуравны жил нь орж байгаа хүүхдэд дурдан бүс, хорин тав болон гучин долооны жил орж байгаа хүнд мал бэлэглэдэг нь эд хөрөнгө арвижихийн билэгдэл юмсанж. Мөн наяас дээш насны буурайнуудад заавал бэлэг өгөх ба зуун арав насалсан хүнд цагаан дээл өмсгөн сүйх тэргэнд суулгадаг байжээ. За сонирхуулахад ийм бөлгөө.

Харин Эрхүүгийн оюутнуудын ихэнх нь дотуур байрандаа курс курсээрээ тус тусдаа нийлэн тэмдэглэдэг. Тэд уламжлал ёсоор ул боовоор таваг засч,  мөн жимс ногоо салат бэлтгэдэг.

Айраг байхгүй болохоор пивоор орлуулчихна. Байгаа шууз болон түүхий махнуудаа боломжоороо нийлүүлээд бууз хийчихнэ. Харин ууцны оронд заачихсан гахайн толгой ширээн дээр үзэгдэх нь элбэг. Олон Монгол оюутантай дотуур байранд өргөн хэмжээний золголт явагдана. Уншлагын танхимд юмуу урлагийн заланд дээд курсынхэн дээр доод курсынхэн орж ирж золгоно. Эрхүүгийн улсын техникийн их сургууль цагаан сараар бөхийн барилдаан зохиодог уламжлалаа хадгалсаар иржээ. Тус сургуулийнхан шинийн нэгний өглөө бөхөө үзэцгээдэг. Эрхүүгийн техникийн их сургуулийн барилдаанд 2010 оны төгсөгч Түвшинбаяр 4 удаа дараалан түрүүлж байсан удаатай. Харин мөр гаргах нь ховор. Хүний нутагт зүг чиг гаргах нь дэмий гэж үздэг. Эрхүүд цагаан сар идээ ундаа элбэгтэй сайхан болж өнгөрдөг байна.